Ka Oiaio, Volume I, Number 113, 5 June 1896 — Page 2
| This text was transcribed by: | Leimaile Ku?upolialoha Barrett |
| This work is dedicated to: | Katherine Violet Kahaunaniomaunakeaomaunaloa Nathaniel and Conrad Alohalani Nathaniel |
Ka Oiaio/Ka Oiaio Puka La/
Hoopukaia i na la a pau koe ka la Sabati a me Lapule no 30 keneta o ka mahina.
KA OIAIO PUKA LA.
JOHN E BUSH, Luna Hooponopono a me Puuku
HONOLULU, IUNE 5. 1896.
KA WAIONA
Ke paio nei na haipule me na aia, e pili ana i keia mea he waiona, ma Hawaii nei a ma na wahi e ae o ke ao. Ma ka hoomaopopo aku ua ikaika no na kakoo o ka poe i ae i ka waiona e inu ia. Pela ma Hawaii nei, ina e hoomaopopoia ma ka hooholo ana a ka Aha Kaukanawai. Ua lawe ia mai kekahi bila kanawai e hoonoa ia ka auhau dute maluna o ka uwaina maoli i hana ia mai ka hua mai o ka laau uwaina. Na ke aupuni keia bila kanawai. He uuku loa ka leo o ka hoopono, i loheia ae iloko o ka Hale Ahaolelo e kue ana i ka hooakea ia o ke komo ana mai o ka uwaina mai na aina e mai. He nui na kahunapule a me na keiki a na misionari maloko o ka Ahaolelo o ka Repubalika o Hawaii, aka ua hamau ko lakou leo, ua hewa ko lakou waha, a ua hoopiliwale lakou mahope o ka mana o ka noonoo pono imi loaa. Ua oi aku ke dala ma ka lakou hookuku ana mamua o ka pono, ka mea make mamua o ka mea e ola ai.
Ua ao ia na haipule he mea make ka waiona. O ka uwaina hou wale no ka mea i olelo ia he kupono e ai a e inu ia wahi a ka Baibala, ke ana o ka haipule ma na mea a pau o keia noho ana. Ua akaka ke kulana o ka aia, aka, o ka ae ana o na keiki o ka malamalama e kuu akea ia ke alanui no kekahi o na agena ikaika loa a Satana e komo mai me ke keakea ole ia aku, he hoike ana mai ia ua mama ko lakou kulana kiai pono, a na oi aku ko ke ao mau hana maluna o lakou mamua o ka ke Akua. O na hana keia i lawe ia ae he kumu hoahewa i ke au noho moi, a he kumu e hoopauia ai ka noho ana o na kanaka Hawaii, ma na wahi kiekie o ko lakou aina hanau, a hoonele ia lakou i keia wa, aka, ke ike like nei no kakou a pau, o ka poe i kue i na kauawai waiona, na hoaie, a me na hana kue i ka pono, i ka wa o keia he aupuni moi, o lakou no keia e hana kanawai nei kakau inoa nei, e kuu akea ia mai ka uwaina, kekahi o na mea ona, a hooulu hana hewa. Oia maoli ka mea oiaio, a he mea minamina ko makou hoahewa ana i ka hoonoa ia ana o ka uwaina, oiai, o ka hoomaka ana keia a o ka hopena aku o ka hookomo ia ana mai o na waiona i oi aku ka ikaika, malalo o na olelo hookamani a maalea i hookomoia mai iloko o ka naau o kanaka e kona enemi, i makaukau e hookomo mai i kana mau apu i kumu e ko ai kona makemake, he hoomake.
NA ANOAI O KANAKA
Ma ka hoomaopopo aku i ke ohohie ia o na hana lealea, na hale keaka a me ua ahaaina, ua oi aku ka ikaika o na anoai a@ai, na lealea a me ka hoomaikai ia o ka Satana mau hana mama o ka ke Akua. E piha mau ana ke Keaka Lio mamua o na hale halawai, a me na Luakini o ke Akua. Uuku ka manaoio o ke ao i keia manawa a kakou e noho nei, e like me ia i oleloia, no na la hope. Ua haalele mai ko ke ao i ka ke Akua, a eia lakou ke kulou nei imua o Moloka.
KELA A ME KEIA.
E haiolelo ana o Rev. Birnie ma ka hale halawai hou ma ke alanui Liliha ae nei, i ka po o ka la pule la 7, a e kokua ia ana hoi na hana ma o ka himeni ana mai o ke kahuli leo lea Hawaii Mele Kuke, a me kekahi poe e iho.
Ua lohe ia, ma ka mahele ana o na puka o ka poe mea mahele iloko o ka mahiko o Pepeekeo, ua puka kekahi inoa he $47,000, a ma o ka mahiko hoi o Kahuku ia la hookahi no, he $1800 kona puka.
Ua hoouna ia aku i ka hale mai pupule, kekahi wahine Hawaii i lilo ka noonoo maikai.
Ua hoouna ia aku kekahi Iapana paahao e noho kuke nei no ka halawai, e hele e kuai i io pipi, o ka hele no ia hele loa, a e ole e imi ia e Toma loaa aku i Kahakaaulana, e hoomaka ana e au a kau iluna o ka mokuahi Iapana, a hoi loa no kona aina hanau. Ua hoihoi ia mai oia, a ua hoi hou aku la no Kawa.
Ua haalele mai o A. A. Montana i kona noho luna ohi auhau ana.
Ua noa ka la Kapule i keia au, oiai ua ae ia ka Bana Aupuni e paani i keia manawa ma ia la. He holomua keia i ka malamalama. Na hana keaka a me na hale lealea koe a hoonoa ia.
I ka Poalua ae nei e ku mai ai o Malulani mai Hawaii mai.
Ua holo aku Lunakanawai Perry no Wailuku, no ka hoolohe ana i kekahi poe hiahia, i hiki ole ia J. W. Kalua ke hoolohe.
O Wm. K. Kathbrun ka hope Luna helu a ohi auhau o ka apana o Koolauloa.
Ua hoohauoliia o Senator H. Walakahauki ma o kona lilo ana i kupunakane, no ka manawa mua loa, ma o ka hanau ana mai a kana kaikamahine, he keikikane nui mohala, i ka Poaha nei.
Ma ke Kinau o keia la, i huli hoi aku ai no Hawaii o Senator Holstein, a o Balauwina hoi no Maui.
He puhi ohe ko Maki Ailana i ka la pule
No ka poe pena a pia i ka helehelena e loaa no ka pia aala Roma ma kahi o Hobron ma.
NO NA AINA KAHIKO
NA KULANAKAUHALE NALOWALE A I LOAA HOU AKU.
MAHELE II.
OO
MOKUNA IV.
MORIA KA MAUNA O KA HALE O KE AKUA
NA AINA MA KA BAIBALA
O keia kahua palahalaha oia no paha ke kuahu "hehi palaoa a Oreanana," a o ke ana malalo ae, ahi one i pee ai me kana mau keikikane @ mai ka anela o ka Haku. (1 Oihanaalii 21:20.) Me he la ka Isaia mau olelo ma ka mok. 28:16, no keia pohaku-kumu, iaia e
hoohalike ana no Karisto ka pohaku-kumu @ ana: "No ia mea, penei ka olelo ana mai a ka Haku, a Iehova aia hoi, ke hoohoho nei au ma Ziona, he pohaku, he pohaku i hooia, he pohaku kihi, ua maikai, he pohaku kumu i hoonohopaa ia: o ka mea e hilinai aku ia ia aole ia e hee."
He hookahi hapa wale o ka nui o ka Luakini a Solomona i kukulu ai i ka A. M. 1011, mai na mea i hoomakaukauia e ke 'lii Davida, a mahope hoi o ke ana i kuhikuhiia mai e ke Akua, i ka Herode i kukulu hou ai, aka ua oi aku nae ka waiwai nui a me ka hiehie o na kahiko o ka hale mua, a ma ke ku ana o ka Pahu Berita mua ka Noho Aloha, a me Shikinah ka Urima a me Thumima, i nele hoi ma ka Luakini hope; aka hoi, "ua oi aku ka nani o keia hale hope i ko ka hale mua," no ka mea ua noho kino ia hoi e ka Hoola a hoomana ma kona mau keena, a lawelawe hoi ma ke kuahu ma kona ano he Kahuna Nui no kakou.
He hana poina ole hoi ka hoolaaia ana o ka Luakini m@a, iloko o ka moolelo o ko ke Akua lahuikanaka ana i wae ai. Ua hoolilo ia hoi he mea poino ole, he anaina kanaka nui o Isaraela, ka pule a Solomona, ka lapalapa ana o ke ahi hemolele maluna o ka lele, a me ke ao o ka nani nana i hoopiha iho ka hale. Mahope o ke ku ana o keia hale nani no eha haneri me iwakalua makahiki, ua @ukuia e Nebukaneza, a o ka nui o kona waiwai ua lawe ia aku me na Iudaio no Babulona. Aole nae he hune olelo kekahi no ka laweia ana o ka Pahu Berita, a he lehulehu ka poe i manao ua huna ia hoi maloko o kekahi o na ana a me na lua malalo o ka luakini. Ua olelo hoi na moolelo olelo waha, (2 Maccabees 2:5.) Ua huna ia e Ieremeia maloko o kekahi ana, a oiai na papa pohaku a me ke gula, he mea popo ole, aole no he mea haohao ka loaa ana aku o keia mau mea ma keia hope aku, me na kanawai o ke Akua. He mea nu hou io kona loaa ana aku!