Ka Wai Ola - Office of Hawaiian Affairs, Volume 38, Number 2, 1 February 2021 — 'O ka 'Ōpelu ko Mākou Nohona [ARTICLE+ILLUSTRATION]

'O ka 'Ōpelu ko Mākou Nohona

j MĀLAMAI ^ _ > KOU KINO f

Na Jodi Leslie Matsuo, DrPH Ikēlā me kēia kakahiaka nui ma ka hola 'ekolu, 'o ke kawewe o nā pākeke, 'o ka huahua'i o ka wai, a 'o ke kamumu o ka hao 'ia o ka hau ko'u uaki hō'ala no ka lā. 'O kēia mau kani ma'ama'ahia ka'u i 'ike ai i ku'u wā e kamali'i ana. 'A'ole ia he mea 'ē, no ka mea he lawai'a 'ōpelu ko'u makuakāne, he ilina ia ma o nā hanauna. He hana no'eau ka hei 'ana me ke kaula'i 'ana i ka 'ōpelu i ili mai ai ma ka hana pū 'ana me nā kūpuna. Mai ke a'o 'ana i ka mālama ko'a a me ka wae 'ana i nā i'a makua, a i ke kāpī a kaula'i 'ana a "lawa kūpono," he koina ka pae ki'eki'e o ka 'ike a me ka ho'omanawanui. Ma nā hopena pule a me nā lā kauwela he nui aia akula mākou ma Nāpo'opo'o e mālama ana i nā lālani pālulu i piha i ka 'ōpelu e kaula'i ana i ka lā. Inā e namunamu mākou i ka pōloli, hopu akula ko'u makuahine i kekahi mau 'ōpelu 'ōiki mai ka pālulu a kuala mai iā mākou i 'ai māmā. 'Oiai mana'o 'ia paha he 'ai māmā 'ano 'ē, he nui nā māhuaola o ka 'ōpelu. He kumu waiwai ia o ka polokina, nā wikamina-B, a me nā 'akika 'ailakele 'ano maika'i like 'ole, e like me ka 'akika stearic, 'akika oleie, a me ka DHA. Ua hō'ike 'ia 'o ka 'akika stearic e 'ai 'ia he mea ia e hō'emi i ka na'okoko LDL a me ka lana o ke koko, a he ho 'oikaika pū i ka hana o ka pu'uwai. E hō'emi paha ka 'akiki oleie i ka loa'a paha i ka ma'i pu'uwai, ka hika-kūpalehia, a me ka 'ūpehupehu. He kōkua ka DHA i ka hō'emi 'ana i nā hi'ohi'ona o ka lumakika rheumatoid, ka ADHD, a me ka papaha i ka ma'i Alzheimer's, ka ma'i 'a'ai, a me ke kaukoma. 'A'ohe kānalua iki, 'o ka 'ai 'ana i ka 'ōpelu kai kāko'o mai i ke olakino maika'i o nā kūpuna. '0 ka ho'i hou 'ana i nā mea'ai a nā kūpuna ke kōkua paha iā kākou pēlā. ■