Ke Aloha Aina, Volume I, Number 1, 25 May 1895 — KE ALOHA AINA; Heaha ia? [ARTICLE]

KE ALOHA AINA; Heaha ia?

O ke Aloha Aina, oia ka Ume Mageneti iloko o ka puuwai o ka Lahui, e kaohi ana i ka noho Kuokoa Lanakila ana o kona one hanau ponoi. O ka Ume Mageneti, oia no ka ikaika nana i kaohi i ke kui mageneti o ke Panana, e hoopololei ana i kona kuhikuhi i ka welelau Akau o ka Honua nei, a i ka hoku akau hoi. He mea pohihihi ka ike ana i kahi i ioaa ai ia mea he ume iloko o ka hao Mageneti, aka, eia ka mea maopopo loa, aia kela kui Mageneti ke hoomau la i kona kuhikuhi ana i ka hoku akau ma ka welau akau o honua nei. Pela ke aloha iloko o ka puuwai o ke kanaka no kona aina hanau ponoi. Aole i ike maka ia ia mea he aloha, aole hoi hiki ke hoopaaia, aole hoi e hiki ke haha ia; aka, ua laha wale aku oia, a ua lele wale aku a pili i kona aina hanau ponoi iho, me he ume la o ke kui Mageneti. Ina i hookokoke ia na kui hao Mageneti i kahi hookahi, alaila, he mea maopopo loa me ke kanalua ole o ka manao, ua ume like no lakou a pau loa kekahi i kekahi. Pela hoi na lahui a me na kanaka a pau loa i noho pihaia e ka uhane aloha i ka aina hanau. E ike auanei ko lakou huki ana, ume ana, a me ko lakou kaohi ana i ka noho Kuokoa Lanakila ana o ko lakou aina hanau. Na kela aloha iloko o lakou e

hoolilo ia lakou i poai hookahi, e kupaa ana, a e hakoko ana me ka wiwo ole imua o na enemi, e hoao ana e kaili i ko lakou noho kuokoa ana. No laila, ua lilo ka hune, ka nele, ka inea a me na popilikia he nui i mea ole loa ia lakou. No ka mea, ua nui aku ke aloha no ka aina hanau mamua o na mea e ae a pau loa. He holoholona ke kanaka ke nele oia i keia ano he Aloha Aina, a i ole ia, he kumakaia paha kona ano like loa. He haahaa loa ke kulana o ke kanaka aloha ole a kumakaia paha i kona one hanau. Aohe ona noonoo hou ia he pono ka i koe iaia, a e maalo ae ana oia iwaena o kona lahui ponoi iho me ka hoowahawaha loa ia aku e lakou.