Ke Aloha Aina, Volume I, Number 3, 8 June 1895 — NUHOU KUWAHO [ARTICLE]

NUHOU KUWAHO

UA LOHE WALE IA AE Ua oleloia ae, e paniia ana ko Gresham wahi e Don. M. Dickinson, ka mea i noho Luna Leta Nui i ka wa mua o ko Cleveland Aha Kuhina. KAUOHAIA MAI E HOI. O Rear Adimaral Beardslee, ka Luna Koa Kiekie ma ka Moana Pakipika ma na wai o Hawaii nei, a e noho nei maluna o ka moku lawe hae Piladelepia, ua kauoha ia mai nei oia e ke Aupuni Amerika e hoi aku. HE LONO WALE NO. He lono no hoi kekahi i pahola ia ae i ka wa i ku mai ai ka mokukaua Bennington i keia awa, o Hon. James H. Blount, o Georgia, ke holo mai ana i Kuhina noho no Hawaii nei, ma ko Willis wahi. O keia Blount no kela Komisina i holo mua mai ai i Hawaii nei i ka malama o Maraki 1893. HOOLE O GEREMANIA. Berlin, Mei 2:-- Ua hoole ke aupuni o Geremania i ka huipu ana me Rusia e kue aku ia Iapana i ka noho ana o kona pualikoa ma Corea. Nu Ioka, Mei 26. -- Ua hoike ae ka mea kakau ma Europa no ka nupepa "Ahailono," penei: Ke hoike aku nei au he mea pili i na nuhou, oiai, o ka Emepera Nicholas II, ua manao loa oia e hookahuli i na Iapana. Ua haiia mai au e kekahi mea kulana kiekie, a he mea maopopo loa, aole loa ia mea e aui ae ana ma ko ka Emepera manao makemake a makemake ole paha e hooko aku ia mea. Ma ka nana aku ma na ano a pau loa, o ka helehelena o ka ka Emepera Nicholas manao, o ka lawe mai i na wahi a pau i mea e houhalu aku ai i ke aupuni o ka Mikado. O kana alahele mua i hana ai, oia ka manao ana e hoohuipu me Geremania no ka lele kaua ana aku maluna o na lapana, i mea e pau ai ka noho ana, o na pualikaua ma Corea. Ua hiki ke hoomanao ia, o ka pauku mua o ke kuikahi e pili ana i ka aeia ana o ke kuikahi o ke aupuni Hermit, he hiki wale no ia Rusia ke hana e like me kona makemake a me kona mana, a e hoolilo i na pauku i mea ole. O ko Iapana noho hoomalu ana maluna o Corea, he mea hoouluhua loa ia ia Rusia i ka loaa ole he awa nona ma ke kai o lapana. HOOHUI AUPUNI. Wasinetona, Mei 26.-- Ua hooholoia he kuikahi hou ma- waena o na aupuni o Nicaragua a me Honduras, a ua loaa aku na kope o ia mea ma Wasinetona. Ua hanaia ke kuikahi no kekahi manawa, a e kukala

ia ana a lilo i mea mana ma ka 15 o Aperila i hala iho nei. O ka mua loa keia o ka hooia ana, e hoopau i ka noho liilii ana o na repubalika ma Amerika Waena, e like me Nicaragua, Hondurus, Guatemala, Salvador a me Costa Rica. O ke kuikahi mua, he mea ia e hoohui like ai ma ke pale ana aku i na enemi a i ka poe hoi e hoopoino ana i ka poe o ka aina. He mea hoi ia e kau like ai na auhau oihana kalepa, aole hoi e auhauia ma kekahi aina ka mea i hookuuia ma kekahi aina. A he kanawai hoi i hoomaopopo ia e kue ana i na hooulu kaua ana mawaena iho o lakou, mamuli o ka waiho ana aku ma kekahi aha uwao maloko o ka hapa poepoe komohana. KE KUOKOA O FOAMOSA. Wasinetona, D. C., Mei 25. Ma ka hoike a Kuhina Denby e hai ana, i ke kukala kuokoa ana ae o Formosa, aole loa ia he mea ano kaumaha loa ma ke Keena Mokuaina. Ma na olelo hoakaka o ka palapala, e kali ana oia no ka Ioaa mai o ka oleloao e ike aku i ke aupuni hou, a i ole o ke kupono paha i ke kulana e ike aku ai ke Aupuni Amerika, aka, aole !oa he keehina i hoohana ia e ke aupuni, aole hoi he hana a Kuhina Denby i hoomaopopo ai e hana aku.